Plagosjen me thikë të kryetarit të bashkisë së Divjakës dhe të shoferit të tij, deputeti i PS-së, Erion Braçe e quan sulm të pastër kriminal. Mes lutjes për t’u fokusuar te shëndeti i të lënduarve si gjëja më e rëndësishme për momentin, ai ka bërë dhe një thirrje për mediat.
“Një gjë po ua kërkoj me shumë ngulm: mos gënjeni! Nuk ka ndodhur asnjë konflikt në poliklinikën e Divjakës, zero. Kryetari i Bashkisë së Divjakës ka qenë në punë, nuk ka qenë në poliklinikën e Divjakës. Kjo sa për fillim. Do ju lutesha edhe njëherë mos gënjeni mbi ngjarjen. Është një sulm i pastër kriminal kundrejt një zyrtari në detyrë”.
Kryetari i Bashkisë Divjakë, Fredi Kokoneshi dhe shoferi i tij Gazmir Bullari i janë nënshtruar ndërhyrjeve kirurgjikale pasi u plagosën me thikë nga Orgest Xhelili.