Analisti Baton Haxhiu ka komentuar intervistën e fundit të Fatos Nanos. Haxhiu tha qëndrimet e Nanos janë të ftohta dhe të sinqerta pasi këtë ia mundëson dhe distanca historike me ngjarjet. Kritikat e Nanos ndaj Ramës në të kaluarën, Haxhiu i konsideroi pjesë të betejës politike.
“Distanca historike me ngjarjen i krijon një ftohtësi dhe gjykimi mund të jetë më i sinqertë. Por fakti që Fatos Nano nuk la asnjë fjali kritikuese për Edi Ramën dhe tha se i duhej një rebel kur ai ishte në qeveri dhe që i duhej për pasues, tregon një njeri që ka ndjeshmëri ende për PS. Ka qenë betejë politike atëhershme, ndërsa gjykimi aktual është gjykim historik”, u shpreh Haxhiu.
Baton Haxhiu shtoi se tashmë Nano nuk ka më ambicie për poste të larta dhe rrëfimi është pa vrazhdësi dhe shton se më shumë është Nano që i ka shërbyer Ramës se sa anasjelltas.
“Në peshën se kush i ka shërbyer Fatos Nano, Edi Ramës apo Edi Rama, Fatos Nanos, nuk është ‘Joy rezidencë’. Ai i ka ofruar të ardhme politike dhe Rama i ka ofruar një leje ndërtimi, gruas së tij tek e fundit”, përfundoi Haxhiu.