Policia e Shtetit ka reaguar pas arrestimit në Francë të Ermal Beqirajt, i shpallur në kërkim ndërkombëtar nga SPAK në kuadër të hetimeve për çështjen e “AKSHI”-t.
Sipas njoftimit zyrtar, arrestimi u bë falë bashkëpunimit mes Interpol Tiranës dhe Interpol Lion.
“Në vijim të bashkëpunimit të ngushtë ndërmjet Interpol Tiranës dhe Interpol Lion, Francë, si dhe pas shkëmbimit të informacionit mes dy strukturave, autoritetet franceze kanë konfirmuar arrestimin, në qytetin e Amiens, Francë, të shtetasit E. B, 44 vjeç, i shpallur në kërkim ndërkombëtar, me kërkesë të Prokurorisë së Posaçme kundër Korrupsionit dhe Krimit të Organizuar (SPAK)”, njofton Policia e Shtetit.
Ndaj Beqirajt, Gjykata e Posaçme e Shkallës së Parë për Korrupsionin dhe Krimin e Organizuar kishte caktuar masën e sigurisë “arrest në burg”.
Ai akuzohet për veprat penale “Heqja e paligjshme e lirisë”, “Konkurrenca e paligjshme nëpërmjet dhunës”, e kryer në formën e veçantë të bashkëpunimit, atë të grupit të strukturuar kriminal, “Shkelja e barazisë së pjesëmarrësve në tendera apo ankande publike”, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, si dhe “Pastrimi i produkteve të veprës penale”.
Pas arrestimit në qytetin e Amiens, pritet të nisin procedurat për ekstradimin e tij drejt Shqipërisë.