100 makina me targa të huaja janë shpallur të rrezikshme nga Policia Rrugore e Fierit, pasi janë konstatuar nga radarët automatikë me shpejtësi mbi normat e lejuara.
Policia e Fierit u ka përcjellë të gjitha pikave të kalimit të kontrollit kufitar listën me targat e automjeteve, me qëllim pengimin e tyre për të mos vijuar lëvizjen më tej pa mbaruar veprimet për shkeljen e konstatuar.
Pas “Njoftimit në Kufi” lidhur me 100 mjete të shpallura “Alert” për shpejtësi tej normave të lejuara, matur nga aparatura ‘Radar ComLazer’, në PKK Morinë, në Portin e Vlorës, në pikën e kalimit Kufitar Tushemisht, janë konstatuar dhe ndëshkuar 4 mjete, të cilat pas likujdimit të masave administrative, u lejuan të vazhdojnë udhëtimin.
Policia Rrugore e Fierit apelon për të gjithë drejtuesit e mjeteve të zbatojnë me rigorozitet rregullat e qarkullimit rrugor, pasi do përballen me radarë, policë rrugorë. Çdo shkelje e kryer nga ana e tyre do përkthehet në masë administrative pas filmimeve të kryera nga mjetet logjistike bashkëkohore që tashmë Policia Rrugore ka në dispozicion për të përmbushur detyrën, me qëllim parandalimin e aksidenteve rrugore.