Presidenti i Serbisë, Aleksandar Vuçiç, i ka dhënë një urdhër të prerë ushtrisë dhe policisë serbe që të tregohen vigjilentë dhe të jenë gjithmonë në gjendje të lartë gatishmërie pas ngjarjeve të fundit në Ukrainë.
Njohja e “pavarësisë” së dy rajoneve brenda Ukrainës dhe futja e trupave ruse në territorin ukrainas në kundërshtim me të drejtën ndërkombëtare, ka bërë që edhe aleati i tij në Ballkan të aktivizohet.
Mediet serbe të cilat janë të afërta me Vuçiçin raportojne se presidenti ka vendosur në gatishmëri ushtrinë dhe policinë e vendit.
Presidenti i Rusisë, Vladimir Putin, ka urdhëruar para pak çastesh ministrin rus të Mbrojtjes, “që të sigurojë paqe” në Donetsk dhe Luhansk.
Madje raportohet se ka filluar futja e trupave ruse në dy rajonet, që disa orë më parë edhe zyrtarisht Kremlini i njohu si shtete të pavarura.
Në momentet që Putin po shpjegonte arsyet se pse ka vendosur të nënshkruaj dekretin për njohjen e këtyre dy rajoneve separatiste në lindje të Ukrainës, një konvoj ushtarak – pra me autobusë dhe tanke është shfaqur.
Kujtojmë që tashmë gjenden afër 200 mijë ushtarë rusë përgjatë vijës kufitare me Ukrainën, që prej muajsh janë në gjendje gatishmërie dhe sipas agjencive amerikane të inteligjencës, Putin mundet çdo çast të urdhërojë pushtimin e Ukrainës.