Presidenti i Republikës, Ilir Meta i jep dritën jeshile kabinetit të ri qeveritar duke dekretuar emrat e propozuar për zv.kryeministër dhe për 6 ministrat e propozuar nga kryeministri Rama mesditën e 28 dhjetorit.
Por i vetmi emër që nuk bind kreun e shtetit është Gent Caka, i propozuar për të zëvendësuar Ditmir Bushatin, në krye të diplomacisë shqiptare.
Presidenti duket të ketë mjaft argumenta në lidhje me ministrin e propozuar nga Rama. Që nga fakti se prej vetëm një viti ka shtetësinë shqiptare, eksperinca e pakët në politikë e diplomaci, pozicionimet e tij kundër Kosovës, pasi është shprehur për ndarjen e saj, si dhe mungesa e çertifikatës së sigurisë për Cakën janë disa nga argumentat. Pa folur më tej për përballjet me kolegët e rajonit dhe BE-së, të cilër kanë eksperiencë në diplomaci. Pas këtij vendimi, Presidenti Meta pritet të përballet sërish me kryeministrin Rama, i cili do këmbëngulë në ministrin e tij kosovar me shtetësi shqiptare, por këtë herë vështirë të ketë një tërheqje nga ana e presidentit, siç ndodhi dy muaj më parë në rastin e Sandër Lleshit.
Mos dekretimi për shkarkimin e ministrit të jashtëm Ditmir Bushati ka sjellë gëzim në disa kancelari përendimore, pasi e shikonin Bushatin si një partner të besueshëm dhe profesionist.
Të vetmin koment për lëvizjet në qeveri, Meta e ka bërë në të njëjtën ditë kur kryeministri Edi Rama shpalli ndryshimet në kabinetin e tij.
“Për mua është e rëndësishme të ndryshojë filozofia e qeverisjes e cila duhet të jetë një filozofi bashkëpunuese, bashkëpunuese me opozitën, bashkëpunuese me grupet e interesit, për të bërë ligje më të mira për zbatimin e ligjeve bashkëpunuese me institucionet e pavarura sepse kjo do të na ndihmojë që të jemi më reflektues për të sjellë ato ndryshime që kanë nevojë njerëzit në vështirësi, një pjesë e mirë e shqiptarëve, për më tepër për të zgjeruar dhe konsoliduar shtresën e mesme në vendin tonë që është domosdoshmëri për të evituar një ndarje sociale që mund të bëhej shumë e rrezikshme për shoqërinë tonë. Mund të them që mund të ndërrohet çdo 6 muaj ministri i bujqësisë por në rast se nuk ndryshohen politikat për zhvillimin e bujqësisë për mbështetjen e bujqësisë, ndryshimet e emrave nuk i vlejnë as fermerëve as ekonomisë se vendit. Kam kohë që kërkoj të ndjekim të paktën modelin e Maqedonisë”, deklaroi Presidenti Ilir Meta nga Korça mesditën e 28 dhjetorit.
Ndërkohë, Presidenti vendosi të pranojë emrat e tjerë, ku konkretisht: Erjon Braçe, do jetë zëvendëskryeministër në vendin e Senida Mesit;
Emrat e dekretuar
Erion Braçe, Zv.Kryeministër
Besa Shahini, ministre e re e Arsimit
Belinda Balluku, ministre e re e Infrastrukturës dhe Energjisë
Anila Denaj, Ministre e Financave dhe Ekonomisë
Blendi Çuçi, Ministër i Bujqësisë dhe Zhvillimit Rural
Eduard Shalsi, Ministër i Sipërmarrjes dhe Biznesit
Elva Margariti, Ministre e Kulturës
Elisa Spiropali, ministre për Marrëdhëniet me Parlamentin
Ministrat që u larguan
Senida Mesi, Zv.kryeministre
Arben Ahmetaj, Ministri i Financave
Damian Gjiknuri, Ministër i Infrastrukturës dhe energjisë
Lindita Nikolla, Ministrja e Arsimit
Niko Peleshi, Ministër i Bujqësisë dhe Zhvillimit Rural
Sonila Qato, ministre e Sipërmarrjes dhe Biznesit
Mirela Kumbaro, Ministre e Kulturës
Sipas Ligjit dhe Kushtetutës, ministri Bushati është i detyruar të vazhdojë detyrën e ministrit të jashtëm. E me sa duket do ta kap qershori prapë si ministër.