Këshilli i Lartë Gjyqësor ka nisur mbledhjen për të shqyrtuar çështjen “Dvorani” pasi kreu i KED-së depzitoi argumentat e tij pranë këtij institucioni.
Dvorani argumenton se KLGJ nuk ka kompetencë për të shqyrtuar një kërkesë të tillë, ndërsa shton se Presidenti duhet të jetë më i përmbajtur.
Më tej, në letrën e tij, kreu i Gjykatës së Lartë e konsideron këtë një goditje të institucioneve të pavarura. Sipas Dvoranit, emërimet në Gjykatën e Lartë nuk bëhen me emra, por me pozicione. Ndërkohë, pritet që Këshilli i Lartë Gjyqësor të marrë në shqyrtim çështjen në mbledhjen që do të zhvillojë gjatë ditës së sotme.
Me anë të një relacioni, Komisioni i Zhvillimit të Karrierës i kërkonte Këshillit të vlerësonte: “A i ka mbaruar zotit Dvorani detyrimi për të qëndruar në detyrën e gjyqtarit në Gjykatën e Lartë deri në emërimin e pasardhësit? Në hipotezën që ky detyrim i ka mbaruar, në situatën që zoti Dvorani vijon të qëndrojë në detyrë, a është Këshilli autoriteti që ka kompetencën për zgjidhjen e këtij ngërçi? Nëse po, cila është mënyra e veprimit të Këshillit? A mund të jetë një vendimmarrje një mënyrë veprimi nga Këshilli? Nëse po, cila vendimmarrje e Këshillit i përgjigjet situatës konkrete? Nëse jo, cila mund të jetë forma e veprimit nga Këshilli?”.
Duke bërë një përshkrim të mandatit të Ardian Dvoranit, që nga nisja e deri në vazhdimin e tij dhe jashtë afatit, Komisioni thotë se vlerëson se ai ka përfunduar. Megjithatë, ajo që e mban në detyrë Dvoranin, është pika 5 e nenit 136 të Kushtetutës. Ky ndryshim në Kushtetutë ka hyrë në fuqi dy ditë më parë se të hynte një vendim i Gjykatës Kushtetuese, që pranonte padinë e një grupi deputetësh për shfuqizimin e një ligji të ngjashëm, i cili mbante në detyrë gjyqtarin. Në atë kohë, Kuvendi nuk votoi kandidaturën e Alaudin Malajt të miratuar nga Presidenti dhe vendi i Dvoranit nuk u plotësua asnjëherë, duke mbetur në detyrë 6 vite më shumë.