Personi që ka bërë kallëzimin në prokurori për Fredi Belerin, edhe pse është bërë bashkëpunëtor i prokurorisë ai është kërcënuar me jetë. Prokurorja e SPAK-ut, Dorina Bejko deklaroi se dëshmitari dhe familjarët e tij janë kërcënuar gjatë kësaj periudhe madje Arsen Ramës i është dëmtuar edhe automjeti.
Sot po mbahen dy seanca për Belerin. Njëra prej seancave po mbahet në GJKKO ku do të merren në pyetje dëshmitarët e akuzës mes tyre dhe Arsen Rama. Me kërkesë të SPAK GJKKO vendosi që seanca të zhvillohet me dyer të mbyllura.
Arsen Rama denoncoi blerjen e 8 votave me 40 mijë lekë nga Fredi Beleri. Sot Gjykata rrëzoi edhe dy kërkesat e Belerit për përjashtimin e Irena Gjokës nga trupi gjykues si dhe kërkesën për përjashtimin e te gjithe trupit gjykues. Sipas gjykates të dyja kërkesat janë të pabazuara.
Gjykata e Lartë po zhvillon një seancë për Belerin ku pritet të merret vendimi se cila prej gjykatave ka kompetencën për t’i dhënë lejen e posaçme Belerit në mënyrë që ky i fundit të bëjë betimin si kryebashkiak.