Këtë të premte në Konferencën e Kryetarëve në Kuvend, ministrja e Financave, Delina Ibrahimaj, po prezanton projekt buxhetin për vitin 2023. Fillimisht mbledhja pati debate pasi deputetja e Partisë Demokratike, Jorida Tabaku, ka thënë se qeveria nuk ka sjellë paketën fiskale.
Tabaku kërkoi që seanca të mos zhvillohej pasi mungon paketa fiskale, ndërsa mazhoranca vendosi vijimin e punës, pasi edhe paketa do prezantohet në vijim dhe votimi i buxhetit dhe paketës fiskale do bëhen bashkë.
“Lufta ka pasur ndikim të madh në ndërtimin e buxhetit. Në prezantimin e buxhetit do ju sqarohet se si do implikojë paketa fiskale buxhetin. Të dyja do diskutohen bashkërisht. Paketa do miratohet të mërkurën e ardhshme dhe do diskutohen bashkërisht”, tha ministrja Ibrahimaj.
Më pas ministrja i Financave vijoi me prezantimin e projektbuxhetit. Ajo tha se vendi ka përballuar pozitivisht pasojat e luftës në Ukrainë dhe se rritja ekonomike është mbi parashikimet.