Prokuroria Tiranë ka vendosur mos fillimin e procedimit penal ndaj Autoritetit të Dosjeve i bërë nga kreu i Partisë së Lirisë, Ilir Meta.
Prokuroria arsyeton se është regjistruar kallëzimi i Metës me datë 6 shtator 2022, ku ish-presidenti ka paraqitur pretendimet e tij se veprimet e anëtarëve të AIDSSH-së janë kryer në kundërshtim me ligjin.
Ndërkohë, Prokuroria pohon se baza ligjore mbi të cilën ka operuar Autoriteti i Dosjeve, bën të mos gjendemi para rrethanave për regjistrimin e procedimit penal.
“Në vlerësimin tonë, nisur nga çka përmban kallëzimi penal nr.11409 viti 2022 dhe për më tepër baza ligjore mbi të cilën ka operuar Autoriteti për Informim mbi Dokumentet e Ish-Sigurimit të Shtetit (AIDSSH), bën të mos gjendemi para rrethanave për regjistrimin e procedimit penal, që lidhet me ekzistencën e figurës apo figurave të veprës apo veprave penale. Pra, ekzistojnë rrethana që nuk lejojnë fillimin e procedimit penal, rrethana këto të parashikuara nga neni 290/1 germa “ç“ të K.Pr.Penale. Sa më sipër, në mbështetje të nenit 291/1/2 të K.Pr.Penale, më datë 21.09.2022 është vendosur mos fillim i procedimit penal.” – thuhet në njoftim.
Kreu i Partisë së Lirisë e kallëzoi Autoritetin e Dosjeve, pasi ku autoritet nxori emrin e tij si të lidhur me ish-Sigurimin e Shtetit, gjë për të cilën Meta tha se është një manipulim dhe që nuk bëhej fjalë për të.