Prokuroria e Tiranës ka dërguar në gjykatë për seancë paraprake grupin e dytë të të pandehurve që akuzohen për dëmet nga tërmeti i 26 nëntorit.
Objekti 8-katësh i ndërtuar në zonën e Kasharit, nuk përmbushte asnjë nga kushtet teknike të ndërtimit, e po ashtu nuk ka asnjë studim sizmologjik të lëshuar nga instituti përkatës.
Të pandehur për këtë çështje janë sipërmarrësja Vjollca Izeti Hoxholli dhe dy kompanitë e saj Jon dhe Gora. Po ashtu Mark Gjinaj, administrator i kompanisë “Rafaelo 2002”, si dhe Artur Skela, raporton Vizion Plus.
Për Hazhollin dhe Gjinin rëndojnë 3 akuza, ajo e mashtrimit, falsifikimit të dokumenteve dhe fshehjes së të ardhurave.
Sipas ekspertëve të caktuar nga prokuroria, në dosjen e sekuestruar nuk ka asnjë dokument për zbatimin e projektit, e gjithashtu konstatohet se akti i kolaudimit është i falsifikuar. Sa i takon cilësisë së betonit, ekspertët kanë përcaktuar se marka e betonit nuk ka qenë ajo e kërkuar nga projektuesi çka shkaktuar dëme të konsiderueshme materiale.
Hetimet nisen pas tërmetit tragjik te 26 nëntorit, i cili la pas 51 viktima.