Për herë të katër, edhe këtë të premte poshtë zyrës së kryebashkiakut të majtë, kundërshtarët e Erion Veliajt i kërkuan SPAK të hetojë edhe Veliajn për dosjen 5D, çështje për të cilën drejtësia ka çuar pas hekurave disa ish-zyrtarë të institucionit. Skenari nuk ndryshoi, pas fjalimeve u hodhën fruta-perime dhe mjete pirroteknike ndaj godinës së bashkisë së kryeqytetit.
I vendosur edhe nën presionin e mbështetësve që kërkonin çarjen e kordonit të policisë, Tedi Blushi i partisë së Ilir Metës arriti që me një flamur në dorë të kalonte vetëm barrierën metalike. Në një dyluftim me policinë u hoqën kangjellat e hekurit, por të zgjedhurit vendore të PD dhe PL, hezituan të shkonin më tej.
Pas 2 orësh protesta u mbyll duke ja lënë kështu policisë vendin e izoluar si “skenë krimi”. Kjo protestë policisë i solli në dorë edhe dy të kërkuar nga protesta e javës së shkuar që hodhën molotov ndaj bashkisë.