Tensionet shoqëruan protestën e 94-t para Kryeministrisë, ku përplasjet mes tubuesve dhe Policisë përfunduan me arrestimin e 14 personave dhe procedimin penal në gjendje të lirë të tre të tjerëve.
Ngjarja ndodhi mbrëmjen e 1 shtatorit, rreth orës 20:00, në rrugën “Ismail Qemali”, në anën jugore të Kryeministrisë. Sipas Policisë, protestuesit bllokuan hyrje-daljet e institucionit në një kohë kur aty ndodheshin personalitete të larta shtetërore.
Forcat e Policisë krijuan një kordon sigurie dhe për rreth 30 minuta u kërkuan protestuesve të shpërndaheshin dhe të lironin rrugën. Sipas uniformave blu, thirrjet nuk u respektuan dhe situata u përshkallëzua.
Gjatë ndërhyrjes për lirimin e hyrjeve dhe të rrugës, protestuesit dyshohet se kanë bërë rezistencë aktive, janë ulur në rrugë dhe kanë shtyrë e goditur punonjësit e Policisë. Nga përplasjet mbeti i lënduar edhe një efektiv.
Mes personave të arrestuar janë edhe tre organizatorë të protestës: Dritan Goxhaj, Arvina Lleshi dhe Edison Lika.
Të arrestuarit
Dritan Goxhaj, Junik Matoshi, Edison Lika, Erlind Almeta, Sokol Bushi, Lulzim Gjini, Valtion Shameti, Florian Manarkolli, Desiderjo Alimucaj, Bora Mitrovica, Arvina Lleshi, Ylli Brahaj, Arben Kola dhe Arian Dervishi.
Të proceduarit në gjendje të lirë
Mandi Jatagani, Andi Tepelena dhe Altin Goxhaj.
Materialet procedurale janë referuar në Prokurorinë e Tiranës, ndërsa ndaj tyre rëndojnë, sipas Policisë, akuzat për organizim dhe pjesëmarrje në grumbullime e manifestime të paligjshme, kundërshtim të punonjësit të Policisë, prishje të qetësisë publike dhe pengim të qarkullimit të mjeteve të transportit.