Partia Demokratike reagon lidhur me protestën e naftëtarëve të Ballshit para Ministrisë së Infrastrukturës dhe Energjetikës, e cila u shoqërua me përplasje me efektivët e policisë.
PD thekson se naftëtarët janë në të drejtën e tyre për të kërkuar pagat e prapambetura,ndërsa shton se “Kjo është e turpshme dhe Edi Rama nuk duhet të fshihet pas punonjësve të Policisë”.
Reagimi i PD:
Policia e Shtetit nuk duhet të përdoret kundër qytetarëve. Naftëtarët janë në të drejtën e tyre për të kërkuar pagat e prapambetura dhe vijimin e punës. Qytetarët nuk mund të shfrytëzohen, të mos paguhen dhe, në vend të zgjidhjes, të dhunohen nga Policia.
Kjo është e turpshme!
Edi Rama nuk duhet të fshihet pas punonjësve të Policisë! Ai duhet të mbajë premtimet që u ka dhënë naftëtarëve. Të autorizojë Belinda Ballukun që të presë përfaqësinë e naftëtarëve!
Qeveria duhet të dëgjojë zërin e naftëtarëve dhe t’u zgjidhë problemin pa vonesa dhe mashtrime të tjera.
Policia e Shtetit nuk duhet të jetë përballë qytetarëve, por përballë atyre që e vjedhur Rafinerinë e Ballshit.