Partia Socialiste dhe Partia Demokratike e vulës, nisin punën për Reformën Zgjedhore. Një ditë pas letrës së firmosur nga dy kryetarët e komisionit bipartizan, përfaqëuesit e zyrës së OSBE-së ishin sot në kryesi për tu takuar me bashkëkryetarin Damian Gjiknuri. Ndërsa më vonë në orën 14:00 do të takohen me Enkelejd Alibeaj.
“Pata kënaqësi të takoja sot përfaqësuesit e zyrës së OSBE-së në Shqipëri me të cilët diskutuam mbi procesin e reformës zgjedhore, rifillimin e punës në Komisionin e Posaçëm Parlamentar me synim adresimin në ligjin elektoral të rekomandimeve të OSBE/ODIHR dhe vendimeve të Gjykatës Kushtetuese.
I falenderova për mbështetjen e deritanishme dhe për gatishmërinë për të vazhduar këtë angazhim edhe më tej, përmes ekspertizës më të mirë nga ODIHR, e cila do të ndihmojë komisionin për të arritur zgjidhjet e duhura teknike në funksion të adresimit të plotë të rekomandimeve”,-shkruan Gjiknuri në facebook.