Sekretariati i Etikës në Kuvend, me votat e PS-së vijon që të përjashtoi deputetët e PD. Sot ka pezulluar me 10 ditë dy deputetët e PD-së Elda Hoti dhe Petrit Doda për kaosin gjatë seancës së djeshme në Parlament. Përjashtimi i tyre me 10 ditë erdhi pas kërkesës së grupit parlamentar të Partisë Socialiste.
Një kërkesë tjetër në dorë të Sekretariatit të Etikës sot, ishte dhe ajo e grupit të PD-së për përjashtimin e deputetëve socialistë, Erion Braçe, Ilir Metaj dhe Plaurent Ndreca nga komisioni hetimor në shëndetësi. Por kjo këkresë nuk u mor në konsideratë, pasi ishte dorëzuar jashtë afatit 48 orësh pas ngjarjes.
Gjatë seancës së djeshme, Hoti u pa teksa spërkaste nga disa kuti të vogla sallën e Parlamentit dhe pengoi seancën, teksa u dyshua se ishin me përmbajtje lënde djegëse benzinë. Vetë Hoti tha se ishte aromatizues, kurse verifikimet vijojnë. Petrit Doda u pa teksa mblidhte karriget e Kuvendit pranë foltores dhe pengonte zhvillimin normal të punimeve.