Policia e Fierit bën të ditur se ka arrestuar në kohë rekord autorët e vjedhjes së postierit në fshatin Sulaj, të cilit i kishin marrë shumën prej 150 mijë lekësh.
Sipas njoftimit zyrtar, ka qenë vetë postieri që ka lajmëruar efektivët.
NJOFTIMI
Fier
I vodhën me dhunë 150.000 lekë punonjësit të postës, Policia zbardh në kohë rekord ngjarjen.
Falë reagimit të menjëhershëm të shërbimeve të Policisë u bë kapja dhe vënia në pranga e dy autorëve të dyshuar.
Sekuestrohet në cilësinë e provës materiale sasia e lekëve të vjedhura.
Shërbimet e Komisariatit të Policisë Fier, pas njoftimit të marrë nga shtetasi K. Gj. (punonjës i postës) se në fshatin Sulaj, 2 persona të paidentifikuar i kishin marrë me dhunë çantën në të cilën kishte 150.000 lekë të reja, menjëherë kanë shkuar në vendngjarje.
Falë mirorganizimit dhe veprimeve të shpejta dhe profesionale u bë e mundur zbardhja e ngjarjes dhe identifikimi i autorëve të dyshuar.
Si rezultat i rrethimit të menjëhershëm të zonës, shërbimet e Policisë lokalizuan dhe kapën në flagrancë autorët e dyshuar të ngjarjes, të cilëve gjatë kontrollit iu gjet dhe u sekuestrua edhe çanta me sasinë e lekëve që i kishin marrë me dhunë punonjësit të postës.
Në përfundim të veprimeve të kryera, nga specialistët për Hetimin e Krimeve në Komisariatin e Policisë Fier u bë arrestimi në flagrancë i shtetasve G. N., 35 vjeç dhe H. M., 22 vjeç, banues në Sulaj, Fier.
Materialet i kaluan Prokurorisë pranë Gjykatës së Shkallës së Parë Fier, për hetime të mëtejshme, për veprën penale “Vjedhja me dhunë, e kryer në bashkëpunim”.