Kryetari i Partisë Demokratike, Sali Berisha, e quajti dorëzim të kryeministrit Edi Rama vendimin për mosaplikimit të rritjes së çmimit të energjisë për konsumatorët që kalojnë fashën e 800 kilovatorëve të shpenzuara në muaj.
“Rama u dorëzua. Para jush, i kam dhënë një ultimatum në mënyrë të përsëritur. Po rrite çmimin e energjisë, do presësh atë që meriton. Por, sidoqoftë vendimi i tij për t’u tërhequr, nën presion, çka do të thotë, që vetëm presioni funksionon me këtë njeri. Unë u tregoj disa mesazhe të qytetarëve, që më deklarojnë se po rriti çmimet, tani më lind e drejta t’u them këtyre qytetarëve, se guxoi, por nuk guxoi. U tërhoq, u palos”, tha Berisha në një konferencë për mediat.
Kryeministri Edi Rama është tërhequr nga rritja e çmimit të energjisë elektrike. Sipas tij, fasha 800 KW për të gjithë konsumatorët familjarë të energjisë elektronike nuk do të hyjë në fuqi më 1 tetor. Gjatë një komunikimi në rrjetet sociale, Rama tha se rritja e nivelit të baseneve në hidrocentrale, por edhe fillimi i qasjes pozitive të abonentëve familjarë për të kursyer energjinë, ndikuan në këtë vendim të qeverisë për heqjen e fashës.
“Në këtë ulje të ndjeshme, ka luajtur rol rënia e temperaturave të nxehta, por s’ka dyshim se rol të rëndësishëm, ka edhe fillimi i dukshëm i një qasjeje pozitive të abonentëve familjarë, për ta kursyer energjinë. Në këto kushte, ne vendosëm që aplikimi i fashës 800kw, të mos hyjë në fuqi në 1 tetor”, theksoi ai.