Ministria italiane e Ekonomisë dhe Financave ka zbuluar se cilat janë qytetet më të pasura dhe njëkohësisht të shtrenjta në Itali, nëse nuk jeni milionerë, mos i vizitoni as për një kafe.
Jemi në periudhën historike të krizës ekonomike, e cila ul fuqinë blerëse dhe kufizon familjet në shpenzimet e tyre ditore, thotë raporti i ministrisë italiane. Një Itali më pak e pasur se vitet e mëparshme, edhe pse jo për të gjithë.
Sot, pasuria ekziston dhe duket se është e përqendruar në zona të ndryshme të Italisë, të cilat pjesërisht për shkak të bukurisë, pjesërisht për shkak të peizazhit dhe trashëgimisë kulturore, janë shndërruar në “geto urbane”, ku pirja e një kafeje mund të kushtojë deri në 10 euro.
Por për ata që kanë luksin dhe duan të jetojnë në një mjedis që i përshtatet nevojave dhe mundësive të tyre, Ministria e Ekonomisë dhe Financave ka përpiluar renditjen e rajoneve më të pasura në Itali, thjesht duke u referuar tek të dhënat nga deklaratat tatimore.
Qytetet më të pasura të Italisë: Veriu kryeson renditjen
Analiza e bërë nga “Mef” për deklaratat tatimore të vitit 2023, referuar të ardhurave të vitit 2022, evidentoi edhe një herë se si Veriu është protagonist i renditjes së bashkive më të pasura në Itali.
Shumë nga vendet që u renditën në dhjetëshen më të pasur janë në fakt qytete të vogla, turistike, por shumë të kërkuara për të banuar në to.
Në vend të parë? Askush tjetër veç Portofino. Qyteti mban rekordin si vendi më i pasur në Itali falë të ardhurave mesatare prej rreth 90,000 euro në vit për kokë banori.
Nuk është rastësi që Bill Gates zgjodhi atë si vendndodhjen e rezidencës së tij verore për të kaluar pushimet.
Në vitin 2024, pabarazia ekonomike midis Italisë Veriore dhe Jugore mbetet evidente, me të dhënat e përditësuara nga Ministria e Ekonomisë dhe Financave që përvijojnë një ndarje të qartë midis rajoneve më të begata dhe më pak të begata të vendit. Por Portofino nuk është i vetmi që ngjitet në podium.
Në vend të dytë gjejmë Lajaticon, e cila prej vitesh dominon këtë renditje speciale, ndërsa Basiglio mbyll podiumin me të ardhura mesatare afër 50 mijë euro.
Më pas, në mesin e dhjetë qyteteve, janë bashkitë si Cernusco sul Naviglio dhe Sesto San Giovanni, të cilat janë vazhdimisht ndër zonat më të pasura, me të ardhura mesatare midis 40,000 dhe 45,000 euro.
Milani, që është ndër qytetet më të mëdha në Itali, nuk shfaqet në listë, por gjithsesi ka të ardhura mesatare rreth 37 mijë euro për kokë banori, më të larta se ato të kryeqytetit.