Kosova në NATO është një kapital i shtuar është shprehur kryeministri Edi Rama gjatë paradës së organizuar në sheshin “Nënë Tereza”, në kuadër të 10-vjetorit të anëtarësimit të Shqipërisë në organizatën euroatlantike.
Rama tha se anëtarësimi i Kosovës në NATO është “domosdoshmëri, jo për Kosovën thjesht, as vetëm për Ballkanin, po për të gjithë familjen euroatlantike. Përfshirja e plotë e Ballkanit në NATO është padyshim një vizion strategjik dhe përfshirja e Kosovës në NATO do të ishte një kapital i shtuar”, tha Rama.
Anëtarësimi i Malit të Zi dhe Maqedonisë së Veriut ka forcuar stabilitetin në Ballkan, vijoi Rama. Kryeministri tha se baza ajrore e Kuçovës do të jetë ndër bazat më të mëdha të NATO-s në rajon.
“Forcat tona të Armatosura janë sot garant numër 1 i demokrcaisë dhe progresit të Shqipërisë në NATO. Por ato duhet të jenë në vijim edhe më të mirëpajisura, edhe më të mirëpaguara, edhe më të mirëstërvitura”, tha ai.