Kryeministri Edi Rama i ka dërguar një letër publike kreut të PD-së Lulzim Basha ku e fton në dialog pa humbur kohë. Gjithsesi Rama thotë se zgjedhjet e 30 qershorit do të mbahen.
LETER PUBLIKE LULZIM BASHES
Zoti Kryetar,
Ju drejtohem me këtë letër publike, në përpjekjen për t’i thirrur arsyes
Suaj dhe për t’iu kthyer të vetmes rrugë që demokracia njeh, për
trajtimin e mosmarrëveshjeve mes palëve: Dialogut!
Unë sigurisht, s’kam asnjë mirëkuptim për rrugën e zgjedhur prej Jush,
qysh se braktisët marrëveshjen pozitive të 17 majit 2017 dhe vendosët ta
nxirrnit grupimin Tuaj, plotësisht jashtë shinave të shtruara në atë
marrëveshje. S’kam se si ta mirëkuptoj as gjuhën e urrejtjes, as djegien
e mandateve, as dhunën e frymëzuar e organizuar prej Jush, prej së
cilës nuk jeni distancuar asnjëherë; për të cilën jeni akuzuar
botërisht, me emër e me mbiemër, nga partnerët e miqtë e
pazëvendësueshëm të Shqipërisë dhe si pasojë e së cilës sot, një numër
jo i vogël ndjekësish Tuajt gjenden në duart e drejtësisë. S’kam si të
mirëkuptoj kurrësesi, as bojkotin e paprecendentë të zgjedhjeve dhe lëre
pastaj, shantazhin mbi vendin e mbi qytetarët e këtij vendi, se Ju nuk
do t’i lini ata të votojnë në 30 qershor.