Kryeministri Edi Rama ka mbledhur sot në Dajt anëtarët e kabinetit qeveritar. Takimi nisi rreth orës 10:00 të mëngjesit dhe u mbyll pas më shumë se 8 orësh në 18:30. Kreu i qeverisë mbërriti në orët e para të mëngjesit, rreth orës 08:30.
Të pranishëm në mbledhje ishin, ministrat, kryetaret e komisioneve, kryetarja e kuvendit, nënkryetari i Kuvendit, kryetari grupit parlamentar në PS, si dhe drejtorët e institucioneve në varësi të kryeministrit, ndërsa nuk ishin të pranishëm kryebashkiakët.
Në këtë mbledhje u bë një analizë pune për secilin prej sektorëve. Mbledhja u nda në blloqe raportimi, në varësi të tematikave, konkretisht: Integrimi, komunikimi, siguria dhe çështje sociale.
Secili prej ministrave është duke prezantuar objektivat e punës për sezonin e ri në dikasterin që mbulon. Po ashtu në fokus ishte edhe vendosja e objektivave për muajt në vazhdim.
Mbledhja ‘retreat’ e ndarë në 4 blloqe, më të rëndësishme kishte komunikimin dhe integrimi. Në të parën ka qenë referues Endri Fuga dhe në të dytën kryenegociatorja me BE-në Majlinda Dhuka. Ndërsa dy blloqet e tjera që lidhen me sigurinë dhe çështjet sociale, u drejtuan nga ministret Belinda Balluku dhe Ogerta Manastirliu.
Takimi në Dajt shërbeu edhe për analizën e progresit dhe përgatitjet për sesionin e ri parlamentar.
Burime pranë mazhorancës e konsiderojnë mbledhjen e kësaj të diele një hap i rëndësishëm për të adresuar strategjitë dhe prioritetet e ardhshme. Kjo do të jetë një mundësi për të reflektuar mbi arritjet dhe sfidat e kaluara, por edhe për të diskutuar strategjitë për vitin zgjedhor që po afron.
Me rëndësi në këtë mbledhje ishte edhe plani për vitin zgjedhor, pasi ambicia e kryeministrit Rama dhe Partisë Socialiste është fitimi i mandatit të katërt.
Ky takim me qeverinë, i paraprin Asamblesë së Partisë Socialiste, që do të mbahet të dielën e ardhshme, më 8 shtator në qytetin e Durrësit ku pritet të zgjidhet Sekretariati i ri i PS.