Në një kohë kur situata në kufirin e Kosovës me Serbinë mbetet tejet e tensionuar për shkak të reciprocitetit të vendosur nga Qeveria Kurti për targat e automjeteve, e ndërsa apeli i faktorit ndërkombëtar, BE-ShBA bëhet gjithnjë e më i fortë për t’i ulur palët në tavolinën e dialogut, ende nuk ka një ‘OK’, nga Prishtina e as nga Beogradi për konsensus.
Ditën e nesërme, burime për Tirananews.al, bëjnë me dije se kryeministri Rama do të niset drejt Kosovës për t’u takuar atje me autoritete të larta shtetërore.
Ende nuk janë zbardhur detaje nga axhenda e vizitës së kryeministrit,shkruan Tirananews.al, megjithëse vizita shihet si një lëvizje pozitive dhe mbështetëse e Tiranës zyrtare në këto momente të vështira për Kosovën.
Mes dy krerëve të qeverive pritet të ketë diskutime edhe për incitivat rajonale si ‘Open Balkan’ në të cilat Kosova ka refuzuar të marrë pjesë.
Kujtojmë se policia e Kosovës prej 1 jave nuk po lejon që automjetet me targa të Serbisë të hyjnë në territorin e Kosovës.
Qeveria e Kosovës vendosi kështu reciprocitet në targa të automjeteve me Serbinë. Serbia gjithashtu më herët, nuk ka lejuar veturat me targa të Kosovës të hyjnë në Serbi, por u ka vendosur targa të përkohshme. Të njëjtën gjë po e bën edhe Kosova, ku autoritetet në Kosovë po vendosin në automjete me targa të qyteteve të Serbisë, regjistrime të përkohshme për qarkullim brenda në Kosovë.
Kryeministri i Kosovës Albin Kurti, tha se “veprimet e ndërmarra nuk kanë për qëllim të cënojnë lëvizjen e lirë të qytetarëve serbë apo të provokojnë ndonjë destabilizim”.