Rama u rikthye turit të ri paraelektoral dhe po ashtu ju rikthye çështjes së financimeve ruse për Partinë Demokratike, por dhe një tjetër force opozitare siç zbuloi një ditë më parë pa dhënë emrin e saj.
Por ndërsa kupton arsyet përse opozita ka pranuar të destabilizojë vendin duke zbatuar interesat e Kremlinit në Tiranë, ajo që thotë që s’kupton janë njerëzit që i shkojnë pas këtyre forcave antishqiptare.
“Por të gjendesh përpara faktesh aq tronditëse dhe aq domethënëse sa shpërblimi financiar nga të huaj jo dashamirës ndaj vendit për të ngatërruar vendin tënd dhe të vazhdosh të besosh ose ndjekësh verbërisht ata që arrijnë deri këtu, kjo vë në pikëpyetje shumë të madhe çfarë do të thotë të jesh shqiptar”, u shpreh Rama.
Në takimin e parë në Berat që e zhvilloi me fermerët, rishpjegoi vështirësitë ku ndodhet buxheti i shtetit për të mos lejuar që çmimet e rritura të energjisë në tregjet ndërkombëtare ku po blihet energji të reflektohen tek buxhetet familjare dhe biznesit i vogël.
“Sepse çdo familje dhe çdo biznes i vogël në Shqipëri ka një mburojë financiare që e ka vendosur qeveria. Çmimi që paguan çdo familje të jetë 20-25% çfarë paguan qeveria. Çfarë paguan qeveria të jetë 70-75-80% e faturës”, u shpreh Rama.
Kryeministri ju sugjeron dhe fermerëve të Beratit bashkimin si forma më e mirë për të fituar më shumë nga prodhimet e tokës së tyre.