Kreu i PS-së, Edi Rama siguroi sot banorët e Burrelit se mandatin e katërt do të bëhet rruga Burrel-Ulëz. Në një takim elektoral në qytetin e Burrelit, Rama prezantoi investimet 10-vjeçare në qarkun e Dibrës. Ai u ndal te investimet në infrastrukturën rrugore, ku veçoi Rrugën e Arbërit.
”Jemi vetëm 9 ditë larg nga takimi me historinë në kuptimin e vërtetë të fjalës dhe jam realisht shumë i lehtësuar për faktin që nuk po bëjmë një tjetër fushatë duke premtuar se do të mbarojë Rruga e Arbrit, por po bëjmë një fushatë duke ardhur nga Rruga e Arbrit”, tha Rama.
Kryeministri po ashtu shprehu bindjen se në dekadën e ardhshme Dibra do të jetë pjesa më e lakmuar e metropolit të Shqipërisë. ”Natyrisht që akseset në pikat më të bukura janë të domosdoshme dhe ne jemi në proces dhe shpresoj shumë se deri në fund të këtij viti ta kryejmë edhe rrugën e Lurës”, tha Rama.
Nga ana tjetër, Rama siguroi banorët e Burrelit se mandatin e katërt mbetet për t’u bërë edhe rruga që lidh Burrelin me Ulzën, pasi është një zonë shumë e bukur. ”Tani që nga Rruga e Arbrit shkohet kaq lehtë, ajo rrugë kur të transformohet do ta bëjë shumë të lehtë mundësinë për të bërë investime të tjera në atë anë”. Po ashtu kryeministri siguroi se qeveria do të investojë edhe në rrugën Skuraj-Burrel, me gjatësi prej 36 kilometrash.