Kryeministri Edi Rama ka komentuar gjatë konferencës për gazetarët edhe listat e kundërshtarëve në zgjedhje, Partisë Demokratike dhe Lëvizja Socialiste për Integrim.
Përsa i përket skuadrës së PD-së, ai tha se është zhgënjyese duke e quajtur afirmim të fosilizimit të kësaj partie.
“Skuadra e PD është zhgënjyese dhe për mua. Nuk besoj se ky ishte maksimumi që mund të bënte PD pavarësisht situatës ku ndodhet të një lidershipi pa karakter, pa vizion e pa forcë, sepse nuk besoj që rrethi, perimetri i influencës së PD të jetë aq i ngushtë dhe që PD mos të ketë mundësi të ofrojë më shumë se sa kaq. Nëse lista e PS është fuqia e vetëndryshimit, ajo e PD është afirmimi i fosilizimit”, tha Rama.
Ndërsa përsa i përket listës së LSI ai tha se është ajo e SPAK-ut dhe OFL-së.
“Ndërsa për listën e LSI nuk dua të humbas kohë është lista e SPAK-ut dhe OFL-së, një enturazh si mezetë e karkalecave rreth tiganit të Monikës ndërsa kakrkalecat janë aty në qendër dhe është thjesht një afirmim i një katandie keq e mos më keq të një force politike që ka luajtur rolin e saj në proceset demokratike në Shqipëri e që sot është një magazinë private që administrohet nga gruaja e presidentit dhe që shet dokra dhe ble vota”, u shpreh Rama.