Këtë fundjavë Puka mikpritëse ka hapur dyert për vizitorët për t’i njohur me produktet bujqësore, blegtorale e të përpunuara në eventin “Puka Agro-Fest”.
Kryeministri Edi Rama, publikoi pamje nga festa lokale, teksa përcolli atmosferën e promovimit të produkteve bujqësore, blegtorale e të përpunuara, që janë një vlerë e shtuar për ekonominë e zonës dhe agroturizmin, që ka marrë një stad të ri zhvillimi në të gjitha krahinat e vendit.
“Çdo ditë e më shumë po shijohen bukuritë përrallore që askush nuk i shkelte në Pukën tashmë shëmbëlltyrë e pamohueshme e Rilindjes Urbane”, shprehet Rama.
Këtë vit eventi “Puka Agro-Fest”, u ndërthur me një program të ngjeshur artistik për fëmijët, por edhe për të rinjtë, duke tërhequr interesin e shumë vizitorëve dhe banorëve nga zonat për rreth.
Një vizitore nga Shkodra u shpreh e kënaqur që i ishte bashkuar festës me familjen e saj, ndërsa theksoi se kjo festë na bën të njohim më shumë vlerat tradicionale të zonës, produktet dhe bukuritë natyrore të Pukës.
Panairi i produkteve bujqësore dhe blegtorale e ktheu Pukën këtë fundjavë në kryeqendrën e produkteve organike, teksa mbi 200 produkte u ekspozuan në qendrën e qytetit nga fermerë, blegtorë dhe prodhues të tjerë.