Ish-presidenti Bamir Topi e cilëson një sjellje prej frikacaku vendimin e kryeministrit Rama për të mos qenë i pranishëm në interpelancën e thirrur nga opozita për çështjen “McGonigal”.
Në një intervistë për emisionin “Kjo Javë”, Topi u shpreh se kryeministri Rama ka frikë nga Parlamenti dhe nuk e përballon dot, ndërsa shtoi se opozita duhet të insistojë në zhvillimin e kësaj interpelance.
Sipas Topit, kryeministri Edi Rama, duke pasur pushtetin në dorë, i sheh institucionet si copa letre dhe nuk i respekton.
“Ka vite që është paracaktuar si një njeri që i sheh institucionet si copa letre. Ka bërë një hap të gabuar të radhës duke anashkaluar Parlamentin për një çështjen që ka një ndjeshmëri të lartë. Përderisa është një çështje e rëndësishme, nuk duhet ta anashkalonte”. Eksperienca e Komisioneve Hetimore është një eksperiencë pa vlerë. Janë ngritur Komisione Hetimore dhe pas një pune të gjatë sfilitëse grupet parlamentare kanë dalë me raportet e tyre dhe në fund fare është votuar me numrat që ka mazhoranca përkatëse. Opozita duhet të insistonte tek çështja e interpelancës, është detyrim dhe kjo e ngarkon më shumë kryeministrin…Të mos shkosh në Parlament dhe të invadosh me monologë studiot televizive e përkthej si një sjellje aspak të hijshme. Pra një sjellje, sa është autoritar aq edhe frikacak. Ai parlamentin e ka shumë frikë.”