Kryeministri Edi Rama, thotë se Shqipëria është i vetmi vend në Ballkan dhe Europë, ku biznesi i vogël me xhiro vjetore deri në 14 milionë lekë ka zero taksa. Gjatë takimit me asambletë socialiste të njësive 5, 6, 13, 14 të kryeqytetit, Rama theksoi se ne jemi i vetmi vend ku biznesi i vogël operon pa taksa.
“Nuk e ka asnjë vend në Ballkan, lëre pastaj Europën, pasi aty taksat të këpusin në mes”, u shpreh Rama në takimin me asambletë socialiste të njësive 5, 6, 13, 14 të kryeqytetit.
Rama po ashtu bëri të ditur se u rrit edhe tavani i xhiros për përjashtimin nga taksat, në mënyrë që më shumë biznese të përfitonin nga kjo politikë lehtësuese fiskale. ”Nëse në kohën kur ne morëm detyrën, biznesi i vogël quhej biznesi me xhiron deri asokohe 35 mijë euro, sot biznes i vogël quhet biznesi me xhiro deri në 14 milionë lekë xhiro në vit, që nuk paguan taksë, zero taksë”, tha ai.
Kreu i qeverisë vuri në dukje se këto janë hapa të padiskutueshëm të një ekonomie që na jep mundësinë për politika lehtësuese fiskale e sociale.