Kryeministri Edi Rama, thotë se bashkëpunimi me kryetarin e bashkisë së Tiranës, Erion Veliajn është i suksesshëm. I pyetur gjatë një bisede televizive këtë mëngjes, Rama theksoi rëndësinë e bashkëpunimit mes dy pushteteve si themelore.
“Lali Eri ka lindur me këmishë, sepse është themelore për një kryetar bashkie që të ketë derën e hapur dhe të ketë disponimin e qeverisë qendrore për t’u ulur e diskutuar për projekte për të marrë mbështetje. Unë i kam provuar të dyja edhe kur kam pasur mbështetjen e qeverisë megjithëse ka qenë kontekst krejt tjetër, pasi të ardhurat e bashkive ishin të vogla, buxheti i shtetit i vogël, dhe probleme e Shqipërisë shumë ndryshe dhe shumë më të thella. Sepse gjërat harrohen shpejt. Por që të funksionojë bashkia pa pasur mirëkuptim, pa ndarë vizionin me qeverinë, në kontekstin e Shqipërisë është e pamundur”, theksoi Rama.
Ai vuri në dukje se për projektet e Tiranës janë në simbiozë. “Jemi në simbiozë të plotë dhe kjo na jep mundësinë të bëjmë gjëra. Nuk e di nëse ka gjëra që do t’i bëja ndryshe, por gjërat që bëjmë i bëjmë bashkë. Ai ka detyrën të mendojë 24 orë në ditë për Tiranën, të jetë proaktiv, të vijë me propozime, që nuk i mungojnë dhe sigurisht është një bashkëpunim i suksesshëm pa diskutim”, deklaroi kryeministri në “Wake Up”.