Dhuna? Nëse një popull nuk mund të votojë, dhuna më e madhe është dhunimi i votës. Në dy kryeqytete po protestohet: Caracas kundër Maduros, dhe Tiranë kundër Edi Ramës.
Kështu e nis shkrimin e saj e përditshmja italiane, Il Messaggero e cila ka intervistuar ish kryeministrin Sali Berisha.
Sali Berisha, 75 vjeç, lideri historik i Partisë Demokratike drejton protestat e këtyre ditëve. Për 13 vite president dhe kryeministër shqiptar, ai është lideri më i gjatë i Shqipërisë post-Enver Hoxha.
Mjaft i ashpër në deklaratat e tij Berisha ku thotë se nëse Rama nuk do të japë dorëheqjen atëherë qytetarët do ta vrasin e do ta hedhin në lumë.
“Të largohet, të lejojë krijimin e një qeverie të përkohshme me mandatin e përgatisjes së zgjedhjeve të lira për të garantuar paqën sociale në Shqipëri. Beteja është e vështirë, por këto protesta qenë një mësim i mirë e shpresoj që Rama të kuptoj, përndryshe do të ketë ditë të vështira, njerëzit do ta vrasin e do ta hedhin në lumë.” është shprehur Berisha. Rrugë tjetër nuk ka thotë ai, përveç protestave derisa të pranohet kërkesa e demokratëve për qeveri tranzitore.
Përsa i përket reagimit të ndërkombëtarëve që kanë dënuar dhunën e përdorur në protestën e të shtunës, Berisha thotë se dhuna e vërtetë është të dhunosh të drejtën e votës.
