Deputeti i Partisë Demokratike, Gazmend Bardhi ka shpërndarë një status në rrjetin social “Facebook” me anë të të cilit i është përgjigjur deklaratave të sotshme të ish-kryeministrit Sali Berisha, lidhur me qëndrim e BE-së për shpalljen non-grata.
Bardhi shkruan në postimin e tij se Berisha “duhet të dëgjojë apelin e partnerëve ndërkombëtar dhe të ndalë pengmarrjen e PD për interesa të tij”.
Gjithashtu, Bardhi shton se pas SHBA-ve, tani edhe partnerët evropianë po flasin me zë të lartë për rrezikun e izolimit të PD nëse Sali Berisha vijon me “projektin për marrjen peng të PD”.
“Sali Berisha nuk mund të fshihet dhe të bëjë sikur nuk dëgjon dhe nuk kupton. Ky është momenti që të mos bëjë sikur nuk kupton se po e fut Partinë Demokratike në një rrugë pa krye, duke e izoluar ndërkombtarisht dhe duke çimentuar në këtë mënyrë regjimin e Edi Ramës”, shkruan ai.
Reagimi i plotë:
Sali Berisha duhet të dëgjojë apelin e partnerëve ndërkombëtar dhe të ndal pengmarrjen e PD për interesa të tij. Pas qëndrimit të qartë të SHBA, tashmë edhe partnerët europian po flasin me zë të lart për rrezikun e izolimit të PD nëse Sali Berisha vijon me projektin për marrjen peng të PD.
Parlamenti Europian në Raportin për Shqipërinë për vitin 2021 (pika 41) ka mbështetur sanksionet e SHBA për personat e shpallur nongrata për korrupsion madhor dhe i ka bërë thirrje BE-së që të vlerësojë tërësisht një përafrim të mundshëm me veprime të tilla.
Ndërkohë Gunther Krichbaum deputet i CDU/CSU në Bundestagun gjerman, dhe një mik dhe zë mbështetës i PD për shumë vite, ka bërë të qartë se: nëse PD dëshiron të bashkëpunojë në nivel ndërkombëtar, por edhe të marrë në dorë drejtimin e vendit, duhet të mos kthehet tek e shkuara.
Sali Berisha nuk mund të fshihet dhe të bëjë sikur nuk dëgjon dhe nuk kupton. Ky është momenti që të mos bëjë sikur nuk kupton se po e fut Partinë Demokratike në një rrugë pa krye, duke e izoluar ndërkombtarisht dhe duke çimentuar në këtë mënyrë regjimin e Edi Ramës.