Edhe në degët lokale të PD-së në Qarkun e Dibrës kanë nisur përgatitjet për “Referendumin” e thirrur nga grupi nismëtar i rithemelimit të Partisë Demokratike.
Çlirim Gjata ka kontaktuar dy ditët e fundit nismëtarët në bashkitë e këtij qarku dhe ka kërkuar nga ana e tyre të merren me organizimin e votimeve, në bazë të parimit “një antar-një votë”.
Nismëtarëve u është bërë e ditur nga drejtuesit aktual të PD-së Klos, Bulqizë, Dibër e Mat se zyrat nuk do të vihen në dispozicion të “Foltores” dhe se veprimi i tyre nuk është statutor.
Në pamundësi për të thirrur antarësinë në selitë blu të rretheve nismëtarët i janë drejtuar pushtetit lokal për ndihmë, duke kërkuar vënien në dispozicion të mjedise të tyre.
Mirëpo edhe këtu kanë hasur në vështirësi. Vendorët u kanë kërkuar organizatorëve që kërkesa e tyre të jetë zyrtare, me firmë dhe vulë.
Pikërisht vulosja e shkresave drejtuar bashkive i tremb organizatorët e referendumit në rrethe. Dihet se këto shkresa do të protokollohen dhe mund të hetohen lehtësisht nga strukturat e specializuara. Vulat në vendin tonë prodhohen nga Ministria e Brendëshme dhe me autorizim të institucioneve shtetërore.
Burime të rezervuara për tirananews bëjnë me dije se SPAK po heton në të gjithë vendin përdorimin e vulave të prodhuara në rrugë të paligjshme. Nismëtarët e referendumit kanë frikë se edhe ata do të hetohen dhe do të ndiqen penalisht për fallsifikim të vulave dhe logove.