Ministrja e Drejtësisë Etilda Gjonaj, priti bashkë-reporterët e Asamblesë Parlamentare të KiE-së, ku diskutoi mbi procesin e vettingut, reformën në drejtësi, ngritjen e SPAK e BKH, luftën kundër korrupsionit si dhe situata politike në vend.
Në vizitën e tyre fakt-mbledhëse, pasi u njohën me të gjithë rezultatet që janë arritur, delegacioni bëri një vlerësim në secilin drejtim.
Ministrja Gjonaj, ka përcjellë disa nga detajet e këtij takimi, ku ndër të tjera shkruan:
“Pata nderin të mikpres miqtë e Shqipërisë bashkë-reporterë në Asamblenë Parlamentare të KiE-së, ku ndamë biseda të hollësishme mbi procesin e vettingut, reformën në drejtësi, luftën kundër korrupsionit, ngritjen e SPAK e BKH, si dhe situatën politike në vend. Në kuadër të kësaj vizite fakt-mbledhëse, mundëm të marrim nga delegacioni vlerësimet më të mira për të gjithë punën që kemi bërë deri më sot për rimëkëmbjen e plotë të shtetit të së drejtës, i cili me hapat që ka bërë dhe bilancin që ka shënuar, padyshim është një surprizë unike për të gjithë ndërkombëtarët që e përkrahën, dhe një realitet jetik për të gjithë shqiptarët që e ëndërruan. Kënaqësi të dëgjonim prej delegacionit fjalët më çmuese për punën tonë, ku i sigurova se misioni ynë do të vijojë më tej me zbatimin e një sërë projektesh të rëndësishme, për të oksigjenuar plotësisht të gjithë hapësirat që deri më sot kanë cenuar raportin e qytetarëve me sistemin e drejtësisë”, nënvizon Gjonaj.
Delegacioni përbëhej nga z. Andrej Hunko nga Gjermania, përfaqësues i grupit parlamentar të së “Majtës së Bashkuar”, z. Joseph O’Reilly nga Irlanda, përfaqësues i grupit parlamentar i Partive Popullore Europian, z. Bas Klein zv/shef i Sekretariatit në Komisionin Monitorues, si dhe shefja e zyrës së Këshillit të Europës në Shqipëri Znj. Jutta Guezkow.
O’Reilly falënderoi ministren Gjonaj për transparencën, shpjegimin dhe objektivat e vendosura, ku gjithashtu tregoi rëndësinë që ka aplikimi i regjistrit elektronik për deklarimin e pasurisë.
Nga ana e saj, Gjonaj e siguroj se ky projekt është i përfshirë në planin antikorrupsion që ka hartuar Ministria e Drejtësisë.