Partia Demokratike ka nxjerrë një udhëzim për strukturat e saj në të gjithë vendin, duke kërkuar organizimin e një “qëndrese qytetare” kundër projektit të qeverisë për ndryshimin e hartës administrative-territoriale.
Udhëzimi është firmosur nga sekretari Organizativ i PD-së, Klevis Balliu, dhe sekretari për Pushtetin Lokal, Ylli Asllani.
Në dokument theksohet se qëllimi i kësaj nisme është mbështetja e kundërshtimit qytetar ndaj projektit qeveritar për reduktimin e numrit të bashkive dhe mosmiratimin e ndryshimeve të propozuara.
PD shprehet se alternativa e saj për një ndarje territoriale me 100 bashki është modeli i duhur dhe duhet të merret në konsideratë.
Në udhëzim kërkohet që degët e Partisë Demokratike në të gjithë vendin të mblidhen urgjentisht brenda kësaj jave, së bashku me këshilltarët bashkiakë, për të koordinuar qëndrimin e tyre me qytetarët që kundërshtojnë ndryshimet.
Gjithashtu, strukturave të partisë u kërkohet të mbështesin tubimet dhe protestat e qytetarëve kundër projektit të propozuar nga qeveria për reformën territoriale.