Kryeministri Edi Rama në një intervistë për “France24”, i ka dhënë përgjigje disa pyetjeve që janë ngritur pas marrëveshjes midis Romës dhe Tiranës, që parashikon zbarkimin e refugjatëve që do të vendosen në qendrat e pritjes që do të ndërtohen në portin e Shëngjinit dhe Gjadër.
Rama u vendos përballë faktit se Brukseli ka shprehur shqetësime për bashkëpunimin e tij me Melonin. Ai po ashtu iu përgjigj zërave që pretendojnë se Shqipëria po pranon emigrantët në këmbim të një anëtarësimi të shpejtë në BE, duke e mohuar kategorikisht një pazar të tillë.
“Duhet theksuar një arsye shumë e thjeshtë. Është e vërtetë që Shqipëria nuk është ende vend anëtar i BE, por është vend plotësisht evropian, fqinj me Italinë, dhe sikur e njëjta marrëveshje të ishte bërë me një vend të BE, nuk do të ishte fare lajm i ditës. Por fakti që kjo marrëveshje bëhet me një vend jo anëtar shkakton, jo vetëm lajm, por dhe teori konspiracioni dhe dyshime që nuk janë serioze, për mua. Nëse ngremë pikëpyetje për metodën, duhet të ngremë pikëpyetje për gjithë Bashkimin Evropian, duhet të ngremë pikëpyetje për metodën në gjithë vendet e BE, sepse këto qendra pritjeje nuk janë gjë e re. Bëhet fjalë për një qendër pritjeje që është standard në të gjitha vendet e BE”, tha Rama.