Pas situatës së krijuar nga rritja e çmimeve dhe protestave të vogla që u mbajtën nga qytetarët në Tiranë, ministria e Financave dhe ajo e Infrastrukturës kanë hartuar një draft të ri që mbështet familjet dhe biznesin e vogël, dhe që së shpejti pritet të prezantohet edhe publikisht. Paketa e dytë është krijuar për të përmbushur boshllëqet e së parës.
Në paketën e parë financiare që mbyllet këtë qershor, qeveria vendosi tu japë pensionistëve dhe familjeve në nevojë nga 3 mijë lekë për 3 muaj, në paketën e dytë, kompensimi për rritjen e çmimeve të produkteve të shportës, do të zgjerohet, çka mund të nënkuptojë kategori të tjera që përfitojnë rimbursim, ose dhe rritje e vlerës mujore të mbështetjes.
Për shkak se kriza e çmimeve po vijon dhe inflacioni është në rritje, po shqyrtohet mundësia që edhe gjatë vitit 2023 qeveria të ndërhyjë me paketa mbështetëse për qytetarët.