Kreu i Kuvendit Gramoz Ruçi në urimin e tij për punëtorët në ditën e 1 Majit jep mesazhin se rrugët e Shqipërisë duhen ndërtuar dhe jo bllokuar. Ai shprehet se rritja ekonomike duhet të përkthehet në mirëqënie për të gjithë.
“Sot edhe unë ndjehem një punëtor, sindikalist, student, mësues, infermier, polic. Të rrëmbyer pas pasioneve politike, shpesh harrojmë që dhjetra mijra vajza e djem të Shqipërisë kërkojnë të hyjnë në tregun e punës që të bëhen zotër të vetes dhe jetës së tyre. 1 Maji na thërret të kujtohemi për ta. Ne bëjmë retorika, ndërkohë që mbi një milion shqiptarë që punojnë, në sektorin publik apo privat, kërkojnë kushte të denja pune dhe pagë më të lartë. Të ndalojmë fjalët boshe dhe tu kushtohemi atyre. Një pjesa jonë, në emër të interesave të një pakice që kërkon me çdo kusht karrike pushteti, bllokon rrugët e Shqipërisë. Rrugët e Shqipërisë duhen ndërtuar, jo bllokuar”, thotë Ruçi në mesazhin e tij.
1 Maji, vijon kreu i Kuvendit, “na kujton se Shqipëria ka nevojë për politika më të mira, në radhë të parë për botën e punës. Prandaj, të ulim nga tribunat e foltoret politikanët dhe të ngjisim në to njerëzit e punës. Të punojmë që rritja e ekonomisë së Shqipërisë të prodhojë punë dhe mirëqënie cilësore për të gjithë”.