Ajo është një ndër emrat më të njohur të gazetarisë shqiptare, me një karrierë të gjatë në shtypin e shkruar dhe televizion, si dhe 7 libra artistikë që mbajnë autorësinë e saj. Ka patur të ftuar në programet e saj figurat më të njohura njohura politike e jo vetëm, brenda dhe jashtë vendit, por për jetën e saj është treguar gjithmonë e rezervuar.
Megjithatë Rudina Xhunga, një zë i njohur në luftën kundër pabarazisë gjinore dhe kauzës feministe, ka rrëfyer ditën e sotme një episod të vështirë që i ka ndodhur para shumë viteve. Gazetarja e njohur ishte e pranishme në një takim të organizuar nga Prokuroria e Tiranës, në kuadër të “Ditës kundër dhunës ndaj grave”, ku dhe rrëfeu se si përndiqej nga një maniak.
“Kam një eksperiencë personale me Prokurorinë e Tiranës në 2003-2004. Më kërcënonte një njeri i çmendur, më çonte mesazhe pa fund. Mesazhe të pështira. E durova, pasi mendova se “Je person publik dhe se duhet të paguash një ”çmim” ”. E lejova të vazhdonte të shkruante dhe e padita, pasi më kërcënoi.
Por më erdhi përgjigja se ai nuk kishte shkaktuar shkaktuar asnjë vepër penale, pasi më donte. Epo kjo është dhunë ndaj gruas, ndaj njeriut. Një i çmendur më donte. Një i ri që nuk donte veten e vet, më donte mua. Dhe unë duhet ta lejoja?! Ligjet ndryshuan. Tani nuk është kaq e lehtë të duash në këtë mënyrë. Kjo është përndjekje. Tani e sqaruan se kjo është përndjekje dhe jo dashuri. Atëherë mungonte ligji. Kështu bëhen ligjet pak nga pak. Duhet të ngrihet zëri duke mos pasur turp që të dëgjojnë”, tha gazetarja.