Shumë zëra nga Rusia kanë thënë se studentët në Ukrainë po përdoren nga forcat e armatosura ukrainase si “mburojë njerëzore” dhe se “po vinin në lojë çdo mjet të mundshëm për t’i penguar ata të largoheshin dhe të hynin në territorin rus”. Por kjo gjë është mohuar plotësisht nga qeveria indiane.
Përmes një deklarate të ditës së sotme, Ministria e Jashtme indiane theksoi se nuk kishte marrë asnjë raport zyrtar në lidhje me ndonjë situatë pengmarrjeje të ndonjë studenti në Ukrainë. Madje në reagimin e ministrisë, thuhet se India ka kërkuar mbështetjen e autoriteteve ukrainase për të rregulluar trena specialë për të ndihmuar studentët që të dalin nga Kharkiv dhe zonat fqinje në pjesën perëndimore të vendit.
Mendohet se janë ende mijëra studentë indianë të cilët ndodhen të bllokuar në Kharkiv. India nga ana e saj i ka shtuar përpjekjet për evakuim, por po përballet me pengesa logjistike për të kthyer qytetarët e saj në shtëpi.