Britania e Madhe, Shtetet e Bashkuara të Amerikës si dhe një sërë vende të tjera perëndimore i bënë thirrje Interpol-it që ta pezullojë Rusinë nga organizata ndërkombëtare e zbatimit të ligjit.
Sipas asaj që deklaroi sekretarja e brendshme britanike, Priti Patel, shtete si: Mbretëria e Bashkuar, Shtetet e Bashkuara, Kanadaja, Australia dhe Zelanda e Re kërkuan njëzëri “pezullimin e menjëhershëm të qasjes së Rusisë” në sistemet e Interpol-it.
“Veprimet e Rusisë paraqesin kërcënim të drejtpërdrejtë për sigurinë e individëve dhe për bashkëpunimin ndërkombëtar në zbatimin e ligjit”, tha Patel.
Grupi i kërkoi komitetit ekzekutiv të Interpol-it që të marrë një vendim këtë javë.
Patel nuk e specifikoi arsyen e kërkesës, por aleatët perëndimorë janë duke izoluar Rusinë, në aspektin diplomatik dhe ekonomik, qëkur shteti rus ka nisur pushtimin e Ukrainës, më 24 shkurt.
Të dielën, sekretari amerikan i Shtetit, Antony Blinken, tha se Uashingtoni ka parë “raporte shumë të besueshme” se Rusia ka kryer krime lufte gjatë inkursionit, veçanërisht në trajtimin e civilëve.
Javën e kaluar, anëtarët e Këshillit të OKB-së për të Drejtat e Njeriut kanë votuar me shumicë dërrmuese për të nisur hetimin e akuzave për abuzime, të kryera nga forcat ruse në Ukrainë.
Interpol-i, një rrjet prej 194 vendeve anëtare, synon të mbajë nën kontroll krimet ndërkombëtare./ REL