Teksa tha se qeveria e futi në thes ish-kreun e PD-së, Lulzim Bashën dhe se punuan që SHBA të shpall “non-grata” Berishën, kreu i PD-së i bën thirrjen Edi Ramës që të japë dorëheqjen. Në një konferencë për mediat, Berisha tha se në protestë shqiptarët di ti përgjigjen flakë për flakë njërit prej skandaleve më të mëdha të kohërave.
“Edi Rama është absolutisht i pashpresë, ai ka fshehur krimin para drejtësisë shqiptare dhe drejtësisë së SHBA-ve. Ai është në hetim të thellë në SHBA dhe ai hetim është shterues për të gjithë veprimtarinë e tij kriminale ndaj vendit partner, ndaj vendit aleat, udhëheqës kryesor i NATO-s, i paqes dhe sigurisë në botë.
Edi Rama ka konsumuar vepër penale duke fshehur krimin në Shqipëri. Ai ka dërguar dëshmitarë në New York për të hetuar dhe manipuluar komplotin kundër opozitës, ndërkohë nuk ka paraqitur një dëshmitar të vetëm para drejtësisë shqiptare. Fshehja e krimit përbën një vepër të rëndë penale. Kemi të bëjmë me një njeri mbi të cilin rëndojnë vepra të rënda penale.
Me një njeri i cili me veprimet e tij ka kërcënuar rëndë sigurinë e SHBA-ve. Me një njeri i cili me veprimet e tij është përpjekur të përmbysë pluralizmin politik në Shqipëri. Një krim monstruoz, krim kushtetues, por edhe një sërë krimesh të rënda të kësaj afere. Rama të japë dorëheqjen menjëherë dhe të parevokueshme”, tha Berisha para gazetarëve.