Ish-deputeti demokrat, Fatbardh Kadilli ka komentuar situatën brenda Partisë Demokratike dhe rreth mundësisë Ervin Salianji ka për t’u zgjedhur kryetar i Grupit Parlamentar.
Në një intervistë për Euronews Albania, Kadilli u shpreh i indinjuar, për faktin sesi Salianji mund të marrë firmat nga deputetët për atë post, kur më 8 janar të vitit 2022, u përplasën me hu.
“Ajo që më shqetëson më tepër në situatën e sotme të PD-së, veçanërisht Grupit Parlamentar, është mungesa e pozicionimit moral. Unë nuk e di se çfarë po ndodh, pse zoti Salianji ndërron kamp, pse në datën 8 janar del me hu në dorë dhe përplaset me një pjesë tjetër të PD-së dhe në 8 janar pas një viti, mbledh firmat e atyre që i sulmonte me hu në dorë.
Pse ndenji në njëri nëkrah dhe pse kalon në krahun tjetër. Unë këtë nuk arrij ta kuptoj. E vetmja që të mban në kohë të vështira, është te bazohesh te parimet dhe vlerat personale. Nuk e kuptoj pse duhet të ketë kapërcime të kësaj natyre. Nuk ka reflektim kur asnjëra palë, nuk sqaron moralin politik. Përse dikur përplaseshin dhe sot janë bashkë”, theksoi ai.