Takimi i Ervin Salianjit me strukturat demokrate në Durrës për Sali Berishën u bë për agjendë personale dhe mashtrim ndaj bazës. Ai foli me tone të forta, pjesa tjetër e lidershipit zgjodhi heshtjen totale. Fati politik i Salianjit brenda partisë pritet të vuloset në mbledhjen e ardhshme të Kryesisë.
Takimi i Salianjit me strukturat e demokratëve në Durrës nuk u mirëprit nga Sali Berisha. Jashtë oborrit të Parlamentit, kryedemokrati ashpërsoi gjuhën ndaj tij duke e cilësuar si person me agjendë personale që nuk u shërben demokratëve.
“Ai do të ketë agjendë personale, ta vazhdojë gjer në fund. Se çfarë ishte salla, atë e di unë. I përgëzoj strukturat që nuk u mashtruan nga një takim me agjendë strikt private”.
Qëndrimet i bëri edhe më të ashpra, sidomos kur u pyet për pjesëmarrjen në takim. ”Të deklarosh se militanti demokrat nuk dëgjohet, nuk ka mashtrim më të madh”. Nëse kryedemokrati nuk u kursye në qëndrimet e tij, pjesa tjetër e lidershipit demokrat kishte zgjedhur kodin e heshtjes për këtë çështje.