Shtohen kontrollet nga Policia e Rrugore e Sarandës me qëllim identifikimin dhe ndalimin e shkelësve të rregullave të qarkullimit rrugor.
Sipas policisë, kontrollet janë përqendruar në ndëshkimin dhe evidentimin e shkeljeve që janë rrezik potencial për aksidentet rrugore.
Kësisoj në pranga ka rënë 31-vjeçari N. M., i cili ishte duke drejtuar mjetin pa rrip sigurimi e madje, gjatë ndalimit të policisë ka munduar të korruptojë me një shumë parash këto të fundit.
Njoftimi i plotë i policisë:
Policia Rrugore e Sarandës intensifikon masat për parandalimin e aksidenteve rrugore, në zbatim të detyrave të përcaktuara në planin e masave të hartuar menjëherë pas analizës 3-mujore së zhvilluar me Drejtorin e Përgjithshëm të Policisë së Shtetit, gjatë së cilës u lanë detyra për rritjen e forcës ndëshkuese nga ana e Policisë Rrugore, me qëllim rritjen e parametrave të sigurisë në rrugë.
Shërbimet e Policisë Rrugore të Komisariatit të Policisë Sarandë kanë intensifikuar kontrollet në qytet dhe në rrugët nacionale, me qëllim parandalimin e aksidenteve rrugore.
Kontrollet janë përqendruar kryesisht në drejtim të evidentimit dhe ndëshkimit të shkeljeve që janë rrezik potencial për përfshirje në aksidente rrugore, si dhe të evidentimit dhe ndëshkimit të drejtuesve të automjeteve, që tentojnë të korruptojnë punonjësit e Policisë, me qëllim shmangien e masave administrative.
Në këtë kuadër, gjatë ditës së djeshme, Policia Rrugore e Sarandës ka vënë në pranga shtetasin N. M., 31 vjeç, banues në fshatin Berdenesh, Sarandë, pasi është konstatuar duke drejtuar automjetin, pa rrip sigurimi.
Pas ndalimit nga shërbimet e Policisë Rrugore, shtetasi N. M. ka tentuar t’i korruptojë ata, duke u ofruar një shumë parash, me qëllim shmangien e masës administrative.
Po në zbatim të planit të masave, nga Policia Rrugore e Sarandës, gjatë 24 orëve të fundit, janë vendosur 65 masa administrative, kryesisht për ndalim/pushim të mjetit në kundërshtim me sinjalistikën rrugore dhe rregullat e qarkullimit, për parakalime të gabuara dhe për mosvendosje të rripit të sigurimit.
Policia Rrugore e Sarandës falënderon drejtuesit e mjeteve dhe këmbësorët që respektojnë rregullat e qarkullimit rrugor dhe apelon për të gjithë përdoruesit e rrugës që këto rregulla t’i zbatojnë me rigorozitet, pasi do të përballen me forcën e ligjit.