Policia ka zbardhur operacionin për kapjen e rreth 500 mijë eurove të gjetura në një autobus në Portin e Durrësit.
Shuma ishte fshehur në pjesën e sipërme të një autobusi me 6 qese plastmasi, brenda të cilave kishte disa pako.
Uniformat blu kanë shoqëruar disa persona, ndërsa vijon puna për numërimin e saktë të sasisë së parave dhe për identifikimin e personave të përfshirë.
“Në portin e Durrësit, si rezultat i një hetimi njëmujor të kryer nga Policia Kriminale e DVP Durrës, për mundësinë e futjes së një shume të madhe eurosh në vendin tonë, nëpërmjet portit të Durrësit, gjatë ditës së sotme, në kuadër të operacionit policor të koduar “Eurot”, është ushtruar kontroll i imtësishëm nga Seksioni kundër Krimit Ekonomik dhe Financiar i DVP Durrës.
Si rezultat i informacioneve dhe kontrollit të imtësishëm, në pjesën e sipërme të një autobusi janë gjetur të fshehura 6 qese plastmasi, brenda të cilave kishte disa pako, me rreth 500 000 euro.
Nga Policia e DVP Durrës janë shoqëruar disa persona dhe vijon puna për numërimin e saktë të sasisë së eurove dhe për identifikimin e kapjen e personave të përfshirë.
Në përfundim të veprimeve do të japim informacion të plotë”, thuhet në njoftimin e policisë.