Edhe ditën e sotme ka rradhë në Pikën Kufitare Greke të Kakavijës. Me qindra shtetas shqiptare kanë qëndruar me orë të tëra që prej mëngjesit e deri në orët e drekës në pjesën greke të Kakavijës në pritje për të kaluar drejt Greqisë.
Autoritetet greke kanë punuar në orët e para të mëngjesit me sportele të kufizuara ndërkohë që me dyndjen e shqiptarëve në tokën e tyre, janë detyruar të shtojnë edhe një tjetër për të normalizuar situatën.
Ndonëse dje për këtë qëllim u ndodh në Kakavijë konsulli shqiptar në Janinë Eltion Vërleni ku bisedoi me autoritetet greke të kufirit, sërish sot radhët nuk kanë munguar. Sot për herë të parë janë lejuar edhe autobusët shqiptarë të linjave të udhëtarëve drejt Greqisë pas mbërritjes në Kakavijën greke të urdhërit nga Ministria e Transportit helen per rifillimin e udhëtimeve të këtyre linjave nga Shqipëria duke iu përmbajtur rregullave të përcaktuara anti-COVID.