Supersfida e javës 12-të në Premier League nuk ka fitues, Chelsea dhe Manchester United ndanë nga një pikë në barazimin 1-1 që arritën në “Stamford Bridge”. Një pikë që vlen pak për të dyja skuadrat për nga synimet që kanë.
Pas një pjese të parë të mbyllur 0-0, e dyta ka nisur me avantazhin e Manchester United. Djajtë e Kuq përfituan nga një gabim i bujshëm i Jorginhos, i cili si lojtari i fundit kontrollon keq topin dhe shkakton kundërsulmin e mysafirëve të drejtuar nga Sancho, i cili ballë për ballë me Mendy nuk mund të gabojë.
Mesfushori italian korrigjon gjithçka vetë në 69’, teksa tregohet i saktë nga pika e bardhë dhe barazon në 1-1. Në fushë për londinezët futet edhe Lukaku, por pa lënë gjurmë, ashtu si edhe Ronaldo që hyri në të dytën, por që sonte ishte disi në hije.