E para që pranon të nisin bisedimet për Ligjin e Arsimit të Lartë është ministrja e Arsimit Besa Shahini. Ajo pret të takojë studentët dhe pedagogët që të ulen dhe të diskutojnë së bashku në mënyrë që të gjejnë ku çalon ligji i ri i Arsimit.
“Janë një pjesë e studentëve që nuk janë kthyer në mësim. Por unë i pres gjithë studentët dhe pedagogët që të ulemi dhe të gjejmë ku çalon ligji. Kam biseduar me studentë dhe pedagogë, dhe nga ata më kritikët dhe problemet nuk i ka ligji, por janë probleme gati 30 vjeçare. Jam gati të ulemi por kjo nuk bëhet me ngujime, ultimatume apo bojkote”, u shpreh Shahini.
E pyetur për mbledhjen e Asamblesë së Pedagogëve të cilët i lanë dhe një ultimatum Qeverisë, ministrja shtoi se ajo nuk mund të mblidhet pa firmën e Dekanit, ndërsa çdo vendim i saji nuk detyron Qeverinë, por ka fuqi vetëm brenda Fakulteteve. “Që të mblidhet Asambleja duhet të thirret nga Dekani dhe më pas të marrin pjesë mbi 50% e pedagogëve dhe kërkesat e tyre nuk prekin qeverinë por janë për vendimet e brenndshme të Fakulteteve. U ofroj të gjithëve të diskutojmë”, tha sot Besa Shahini.