SHBA nis monitorimin e fortë për zgjedhjet vendore të 14 majit 2023. Kandidatë të pastër të pa lidhur me krimin ose me precedent penalë; garantimi i të drejtës për të zgjedhur lirisht dhe në fshehtësi; ndëshkim të gjithë atyre që synojnë apo blejnë votën; garantim i të dhënave personale të qytetarëve, janë kolonat mbi të cilat SHBA do të vëzhgojë, monitorojë dhe do të kalojë në filtër zgjedhjet vendore të 14 majit.
Në përmbledhje të takimeve të zhvilluara sot me aktorë të ndryshëm politik pjesëmarrës në zgjedhje, përjashtuar “Rithemelimin” e drejtuar nga Berisha, ndërsa Shqipëria përgatitet për zgjedhjet vendore të 14 majit, ambasadorja Kim u takua sot me drejtues të Partisë Socialiste, Partisë Demokratike dhe Partisë së Lirisë, për të nënvizuar rëndësinë e zhvillimit të aktiviteteve në mënyrë të ndershme, transparente dhe të rregullt, në përputhje me ligjin shqiptar dhe standardet ndërkombëtare.
Kim iu kujtoi atyre vëzhgimet dhe rekomandimet e raporteve të mëparshme e ODIHR-it si për shembull ato të përfshira në raportin përfundimtar për zgjedhjet parlamentare të prillit 2021, në rekomandimet e ODIHR të cilat përfshijnë që shteti duhet të garantojë të drejtën për të zgjedhur lirisht dhe në fshehtësi dhe se çdo formë presioni për të zbuluar nëse dhe si kanë votuar njerëzit duhet të parandalohet.
“Agjencitë ligjzbatuese duhet të intensifikojnë përpjekjet për të identifikuar, hetuar dhe ndjekur penalisht rastet e blerjes së votës. Qytetarët duhet të nxiten të raportojnë dhe të japin fakte për çfarëdo blerje votash apo presioni. Shqipëria duhet të garantojë sigurinë e të dhënave personale të qytetarëve. Institucionet përkatëse duhet të hetojnë tërësisht dhe të ndëshkojnë çdo shkelje që ndikon në besimin e publikut në procesin zgjedhor.”- thuhet në njoftimin për shtyp të ambasadës amerikane në Tiranë.
Po sipas këtij njoftimi, legjislacioni duhet të ndryshohet për të siguruar që mediat të jenë në gjendje të mbulojnë në mënyrë të pavarur aktivitetet e konkurruesve në zgjedhje me synimin për të kufizuar përdorimin në lajme të materialeve të prodhuara nga partitë.
Ambasada e SHBA nënvizon se, drejtuesit e partive politike shqiptare, konfirmuan në këto takime se do të shqyrtojnë kandidatët përkatës për t’u siguruar që ata përmbushin kërkesat e ligjit si dhe pritshmëritë e votuesve shqiptarë për kandidatë të pastër.
“Shtetet e Bashkuara do të vazhdojnë të punojnë ngushtë me votuesit, autoritetet, partitë, shoqërinë civile, median dhe të tjerë në mbështetje të një procesi zgjedhor që pasqyron statusin e Shqipërisë si aleate në NATO dhe aspirante për t’u anëtarësuar në Bashkimin Evropian.”- përfundon njoftimi për shtyp i ambasadës amerikane në Shqipëri.